أشهر كدبات بيقولها الناس - الاربعاء 18 نوفمبر 2015 الساعة 03:13 صباحا

كدبوا علينا كدبات كتير قوي واحنا صغيرين واحنا كبار كمان، واحنا بقى من ناحيتنا صدقناهم، تعالوا اسمعوا أهم الكدبات اللي اتضحك عليا بيها وقولولي كدباتكم الخاصة:

1- اللي اتكسر يتصلح

لا مش كل حاجة بتتكسر بتتصلح ولو اتصلحت بتبقى بتعرج عادي.

2- اللي اتلسع من الشوربة ينفخ في الزبادي

محدش بينفخ في الزبادي حتى لو لسانه اتشوه من الشوربة.

3- أحلى أيام حياتنا لسه معشنهاش

لا، غالباً دي أيام الطفولة بس واللي بعد النضج كله ظلمة.

4- العربية فاضية ورا

العربية عمرها ما بتبقى فاضية ورا بالذات لما الكلمة دي بتتقال.

5- اللي تخاف منه ميجيش أحسن منه

لأ، لما بتكبر بتعرف إن اللي تخاف منه مبيبقاش حلو خالص، احنا بس اللي بنتعلم نطنش.

6- الطفل المصري أذكى طفل في العالم

اخطف رجلك لأي مدرسة قريبة من بيتكم واتفرج شوية.

7- الست المصرية مفيش في خفة دمها

احنا رجالة وستات واخدين ريتينج في النكد على العالم.

8- مصر جوها معتدل

ده كان زمان أوي، قبل ما الصيف والشتا في مصر يحصلهم مشكلة في الهوية، والصيف يبقى خليجي والشتا يبقى صيف وأسبوع منه بس أوروبي جليدي.

9- في مصر محدش بيبات من غير عشا

يعني لفلف بس بالعربية شوية بليل هتلاقي ناس بتنام من غير عشا وغطا وبيت من أصله.


المصدر : كسرة الصفحة الرئيسية